Er. Levi-i Pradhan Mantri Fasal Bima Yojana sentong nung aden

Tseminyu, April 5 (TYO) : Mongulbarnü Tseminyu Town Hall nung Housing Parliamentary secretary, Er. Levi Rengma-i Pradhan Mantri Fasal Bima Yojana (Crop Insurance Scheme) indang awareness programme nung shilem agi.
2020 tashi nung India nung aluyimba jenjang renlokba ajanga Developed Nation ka akümtsü atema alizüng yur meranger. Linük yanger mapa nung aluyimertemi tongti shilem agir aser aluyimertemi ajuruba khurettem angateta Prime Minister Narendra Modi-i taküm January 13 nü crop insurance scheme tasen ka tenzüktsü, ta Er. Levi-i o jembidang ashi.
“Iba scheme tasenba dang Pradhan Mantri Fasal Bima Yojana ta ajar aser iba scheme ya India kübok state ajak nung sorkartem den yaritepa mapa küma tenzüktsü” ta paisa shisem.
Iba scheme ya Union Ministry of Agriculture and Farmers & Welfare kübok inyaktsü aser iba scheme ajanga aluyimer nem insurance teyaru tuluba agütsütsü, ta paisa metetdaktsü.
Iba sentong nung Er. Levi-i yimdaklirtem nem Soil Health Card lema agütsü aser ano “Inventory of Agriculture Kohima District” ta ser kaket ka sayatsü. Paisa Krishi Vigyan Kendra (KVK), Tesophenyu nung exhibition lapoktsü.
Sentong nung mendenji KVK, Tesophenyu, Kohima programme coordinator, Dr. V. Akashe Zhimomi liasü aser pai ashiba agi taküm June ita nungi PMFBY tenzüktsü.
Sentong nung SMS, Horti Khekhali Sema-i anküp tepela o jembi aser sentong tembangba sülen technical session ka agidang Dr. Rebecca, VAS, SDVO, Tseminyu, Akhrie Yhome, APPO, Kohima aser Yichan Yanthan, branch manager, Vijaya Bank Tseminyu nungertemi o jembi.