Er. Zale Neikha-i Adventure Camp 11buba lapoktsü

Dimapur, Mongputeni/October 23 (TYO): National Programme for Youth & Adolescent Development (NPYAD) Ministry of Youth Affairs & Sports, GoI kübok Department of Youth Resources & Sports puri ayongba 11buba Adventure camp Youth Resources & Sports, Advisor Er. Zale Neikha-i Mongputeni/Oct 23 nü John Government Higher Secondary School, Viswema nung tenzüktsüogo.
Sentong nung o jembidang, Government of India, Ministry of Youth Affairs & Sports-i iba sentong akatsü asoshi senotsü peria agütsüba atema Neikha-i sorkar dang pelaba lemsatep. Pai ashiba agi, iba sentong nükjidong tongtibangtibaji, adventure tanüla ajungmesoba den saisapong balala nung shilem agiba ajanga lenir dak keta alitsü yimyatem renlokdaktsütsü aser kija taküm renlokdaktsütsü asoshi lir.
Paisa, iba amala sentong ayonga shilem agiba ajanga lanurtem tali longjemdaktsütsü ta ashi.
Kasa mapang nung paisa iba sentong ya state nung aliba lanurtemi district mesera tesem mebendangi tesendaktep tasen yanglutsü asoshi maongka tajungka ama agia shilem agitsü imlaba lemsatep.
Maneni Neikha-i, tarutsü nunga iba amala sentong ayonga akatsü asoshi ministry nungi senotsü teyari meshitsü ta ashiba den iba sentong ajanga sobaliba melentepba angazükba nung teyari agütsütsü ta shisem.
Anogo asemnü amungtsü aliba sentong nung District 10 nungi shilem agir 88 sentepa lir. Sentongtem rongnung Dzukou valley-i atutsüba, Kohima temeket repranga senzütsüba, Dzulekie semdangtsüba, rappelling, ayong adenba yimya angazükba, mi yangluba yimya angazükba, basic survival techniques tem angazükba amala densema lir.
Adventure Camp lapokba sentong nung department nungi lenirtem aser Viswema yimtsüng kübok lokti tentet balala nungi lenirtem arua aden, ta APRO sangdong ka ajanga metetdaktsü.