Erdogan-i aibelener nem tasüba temerenshi agütsütsü onük benokshir

Gaziatep, August 29 (Agencies): Turkey sorkari aibelener nem tasüba temerenshi agütsütsü mapatong tanaben benshitsü onük Turkey Tir, Recep Tayyip Erdogan-i yashi, Deobar nü benokshiogo.
Turkey southeast tsütsü, Gaziantep yimti nung ayongba lokti senden sentong ka nung o jembidang Erdogan-i iba onükji benoka liasü.
“Turkey nübur timbakati aginüba ama, asen sorkari aibelener nem tasüba temerenshi agütsütsü mapatong tanaben benshitsü onük benokshir. Turkey parliament yimsüsürtemi iba onük ya par senden nung benoka, telemtetba tajung agishitsü nungdaker,” ta pai sangoktsü.
Taoba hopta Kurd nunger kiiyir benjung ka nung nisung 54 shi tepseta lendong atalokdaktsü aser iba lendong nung asür kinüngertem den ajurutepa sasa bilembaren lemsateptsü nükjidong nung Erdogan-i Gaziantep tsüngdong tonga aoba osang jangjaogo.
Turkey mitkar telok kati Turkey linük indang yimsüsütsü tashi tashiyim agi tamakok ngua taoba July ita 15 nü agitsü merangba sülen par linüki aibelener nem tasüba temerenshi agütsütsü mapatong tanaben benshitsü onük ya Erdogan-i kanga sashia benoktsü tenzüka lir.
Mitkar teloki yimsüsütsü tashi tashiyim agi agitsü merangba sülen Erdogan-i aniba sorkari mitkar, police, itangitsü ketdangser, osangbener aser kaketshisatsü tashitemetet alir nisungtem pua kanga sashia merenshiba osang bushiteta lir.
Ano, mitkartemi yimsüsütsü tashi agitsü merangtsüsa parnok ajungmesoba ken o nung ajemdaker US nung jenoka alir yimsütsü putir, Fethullah Gulen par sorkar nem amoktsütsü takhangba onüka Erdogan aser par yimsüsürtemi US sorkar den benokba osang jangjaogo.
Turkey sorkari aibelener nem tasüba temerenshi agütsütsü mapatong 2004 küm anen saka iba mapatong tanaben benokshitsü merangba ngua, alima ajunga nung nübur temeten asoshi nokdaker tongti tentet, Amnesty International (AI)-ia Turkey sorkari tasüba temerenshi agütsütsü mapatong tanaben benshiba jakdang kanga junga bilemdangtsü tajungshiba olen ka metetdakja lir.