Erdogan-i China Ato Kilonser, Li Keqiang den ajuruteper

China mitkartemi Beijing kübok Great Hall of the People kimalen agiba tetushi agütsüba sentong nung Turkey Tir, Recep Tayyip Erdogan (Achijilen) aser China Tir, Xi Jinping nati shilem agiba noksa nung angur. (Beijing, July 29)

 Beijing, July 29 (Agencies): Turkey Tir, Recep Tayyip Erdogan-i tanü Bodbar nü Beijing tonga aoba sülen China Ato Kilonser, Li Keqiang den ajurutepba osang jangjaogo.

China nungi missile system alizüktsü jembiba aser Beijing-i par linük nung alir Turkey oshi jembiba Uighur kin ajemshiba den sentakba ken o ajanga Turkey aser China na tsüngda tesendaktep mejungi aküma melenshia par linük ana tsüngda tesendaktep tajungba kümdaktsütsü nükjidong nung Erdogan-i tan China semdangba osang jangjaogo.

Erdogan-i China Tir, Xi Jinping dena ajurutepa China sorkari China anüdoklentip tsütsü, Xinjiang nung alir Uighur kin indang jenjang tajungba kümdaktsütsü onük benoka jembi.

Turkey nunger den sobaliba, tamangba yimsü aser oshioben kasa benshiba Uighur kini Ramadan lumistüren sadema magitetba densema par sobaliba aser inyakyim balala China sorkari songtemtsü merangba osang bushiteta lir.

Turkey-i taoba mapang, 2013 nung China nungi dollar sen billion 3.4 jenjang aketba air defense missile system alizüktsü asoshi tebang agi nangzük saka kasaji mapa küma inyaktsü asoshi zülutepa tezüngzüktep magi aliba osang bushiteta lir.

Aji oda, Erdogan o Xi nati missile alizüktsü den sentakba onüka tanü benoka jembiba osang jangjaogo.

“Ankara-i tajungba küm yangluba HQ-9 long-range surface-to-air missile system China nungi alizüktsü melunga lir,” ta Erdogan-i tanü metetdaktsü.

Erdogan-i 2014 küm Turkey Tir akümba sülen tan mezüngsüa China semdanger lir.