Ering-i CBI nem ken o asadangdaktsüner

Itanagar, Chiteni/July 5 (Agencies): Member of Parliament Ninong Ering-i Oijing Taying asüba ken o Central Bureau of Investigation (CBI) nem bushisüngdang südaktsütsü asoshi union home ministry dang asüngdangogo.
Arunachal MP yagi Sangtennü Union Home Minister Rajnath Singh dang iba ken o ya CBI nem agüja yakata bentettsü asoshi mepeshia liasü. Paisa ashiba agi, state police-i iba ken o tongpoka tejakleni bener aotsü asoshi tamakok nugogo.
“Iba ya ataloker ita 11 buba tashi nunga investigating agency ajanga ken o tejakleni bener motetba ngua ni kanga shishia bilemer,” ta Ering-i Chiteni/July 3 nü Union Home Minister dangi shidi ka nung zülutsü.
“Timla akaba lanur ka tepsetba ya meimbanga meyutettsü aser aibelena alirtemi pua merenshitsüla,” ta Ering-isa ashi.
Kasa mapang nung state sorkari asür Taying tepsetba ken o CBI nem agütsütsü nongnangba atema All East Siang District Students’ Union (AESDSU)-i sorkar aitsüogo.
“Sorkari iba ken o CBI nem agütsütsü asoshi nongnangba ya onoki mangateter kechiyong asür Toko Yame asüba ken o bo asadangtsü asoshi CBI nem agütsüogo,” ta AESDSU puri ashi. Kaketshir lokti tentet-isa ashiba agi, parnoki iba ken o CBI nem agütsütsü asoshi state Home department dak aiben khangogo aser rally nunger amal sentong tema aiben ayongzüka kaogo, ajisüaka parnoki kecha süoki ia mali.
“Department-i aibelena alir ya kümzüka ayur amai onoki bilemer,” ta AESDSU-i ashiba den state police department inyakyim nung tashi maitba indang ashishia liasü.
AESDSU puri chief minister dang iba ken o ya takaratiba nung CBI nem agütsütsü asoshi khangogo aser pai iba ya minyaktetra parnoki state nung longkak aitba sentong balala ayongzüka akatsü, ta amokmeren.