Eros Colony nung kilentzü atangba ajanga nüburtem timtemdar

Dimapur, May 04 (TYO): Dimapur nung Eros Colony kübok Hong Kong Market, MP Road Deluxe point, Elora Line aser Blue Hill station nung kilentzü aoba tongti ‘culvert’ atangba ajanga item kiyong nung aliba ki aser dokantem nung tzü atsünga nisung alitsü mejungi kümogo, ta ECC Chairman, Badu Angami, ECC Secretary, Dietho Rhakho aser Gov’t GB, ECC, Victo Yeptho nungeri külem sangdong ka nung metetdaktsü.
Iba ya ajanga kibong teranati pei ki toktsütsüsa akum aser tang kibong 35 iba timtem agi kongshia lir, ano maneni tzüngluruwa mapang nung kibong aika kongshitsü, ta parnoki ashi.
Tesüiba kümtem nunga tim ketdangsertem dang iba timtem metetdakja liasü, ajisüaka senotsü agi anüngba ajanga kecha meinyaktet.
Ajisüaka tang tamajungba akumba agi kilentzü aoba tesemtem tanga alibaji merüktettsü atema Colony Council-i mera agia inyakdar.
Iba maparen ya Council-i tajungtiba agi item kibongtem teyari agia inyakdar, ajisüaka tongti tetsükdaktsüji- highway lenmang tur culvert tejen nung Hume pipes inoktsü mapa lir.
Joko hopta tasembuba iba mapa inyakba ajanga nüburtem aser gari senzüsembongba nung timtem agütsüdar, aser iba dak sendakba nung council-i ajak dang aremzüka atatsü mepishia metetdaktsü.
Iba den külemi Council-isa kiyongertem aser dokan kiburtem danga kilentzü aodak jana meindoktsü mepishia metetdaktsüogo.
Eros Colony Council-isa Dimapur D.C-i tang teinyakdak maparen atema sen 50,000 tenla agütsüba den külemi iba maparen atema temaba ketdangsertem den jembitsü ta metetdaktsüba atema pelaba lemsatep.
Administrative Officer DMC-i JCB den DMC aayangertem nübu agütsüba, E.E Highways den SDO-i item tesemtem reprangba sülen lenmang atutsü melaba den nüngdakba hume pipe agütsütsü nangzükba aser Staff State Disaster Management Authority-i tesem semdanga nüngdakba maparen inyakba atema pelar, ta kasa sangdong nung shia lir.