Errani-i Dubai Tennis Open final nung takok nguogo

Dubai, United Arab Emirates nung Honibar, Feb. 20, 2016 nü Dubai Tennis Championships tetsür final asaya nung Italy tsür Sara Errani-i Czech Republic tsür Barbora Strycova madak takok anguba sülen lai anguba takok marok nung tebang mesepba noksa nung angur.
Dubai, United Arab Emirates nung Honibar, Feb. 20, 2016 nü Dubai Tennis Championships tetsür final asaya nung Italy tsür Sara Errani-i Czech Republic tsür Barbora Strycova madak takok anguba sülen lai anguba takok marok nung tebang mesepba noksa nung angur.

Dubai, February 21 (Agencies) : Küm 24 buba WTA Dubai Duty Free Tennis Championships asayamung nung tetsür kija asayaba final asaya nung Italy tsür Sara Errani-i 6-0, 6-2 agi Czech tsür Barbora Strycova madak yangi Dubai nung kangasa junga takok nguogo.
Errani-i mezüng set ji minute 30 majungdang kokadok.
“Hau ni iba asaya kara aser mela mela akok dang kanga aoksa ajisüaka tanü ya Barbora asoshia anogo kanga tajungbo masü asü. Iba asaya akokba atema ni kanga pelar,” ta Italy tsür Errani-i Honibarnü iba asayamung indang senpet sen dollar 465,480 anguba sülen ashiba Xinhua osang ajanga metetdaktsü.
World No.22 Errani-i iba final asaya tetenzükdang nungi kanga kara asayameso aser ibaji ajanga Czech tsürlai Errani-i kanga kara zükloktsüba ball tem junga magizükteti liasü.
Anü tatsük 21 degrees Celsius nung gondha ka ser minute trok asayaba sülen Errani-i iba asayamung tatemsa buba asaya nung takok angu. Iba asaya kokli-i tepela nüktzü yimya lai la coach Pablo Lozano dangi asema oa azüit.
“Tereprangertemi kanga nungitogo aser ibaji atema kanga pelar. Ni Czech pusemer tem ola-a aika angashiogo aser ibaji ajanga ni tali ajungmeso,” ta lai ashi.
Errani-i, “Dubai ya jangratemtsü tesem aser yangi aliba Hard Court ya kanga junger,” ta ashi.
Arishi küm 28 tain Errani ya ano February 21 nungi 27 tashi Doha nung sayatsü aliba Qatar Open nunga asayatsü sentong lir.
Ano külen Chinese Taipei nungi Chuang Chia-jung aser la den külemi ser asayala Croatia nungi Darija Jurak nati tetsür tarep asaya nung 6-4, 6-4 agi Caroline Garcia aser Kristina Mladenovic na madak takok nguogo.

You must be logged in to post a comment Login