Estonia nungi teshimtet telok kati Nagaland CM den ajurutep

Dimapur, Dec. 2 (TYO): Bodbarnü Estonia linük nungi aruba teshimtet telok kati Nagaland Chief Minister aser par Cabinet züngsemtem den CMO nung ajurutepa senden ka agiogo.
Estonia nungi aruba telokji Dr Liia Hannie lenisüba kübok aru aser pa ya e-Democracy nung mongin ka lir, aser parnoki e-Governance indang power point presentation ka sayua liasü.
India nung parnoki Nagaland state mezüng semdanger aser ibaji e-Governance nung parnoki ajangshibatem lemsatepa atema lir, ta Estonia teloki ashi.
Dr Liia-i ashiba agi, tanü putu nung e-Governance ya tongtibang inyakyim ka lir aser kobi melii Nagaland dang e-Nagaland State ta ajatsü imlar.
Senden nung Chief Minister TR Zeliang-i tarurtem pela agizük aser power point presentation ajanga senden nung adenertem dang e-governance indang temetettsü rateta sayuba atema pelaba paisa shisem.
Nagaland nung IT department ajanga e-Governance inyakyim tenzüktsü aser züngsemtemi Nagaland nung alirtem dang e-Governance angatetdaktsütsü merangtsü, ta Chief minister-isa ashi.