EU aser Canada nati tongti shishilembatsü tezüngzüktep agiogo

Brussels, October 31 (Agencies): Mapang talang ka atsütepa aruba sülen European Union (EU) aser Canada nati otsüsütsüsa tetsükdaktsü kecha meli shishilembateptsü tezüngzüktep Belgium yimtiba, Brussels nung yashi, Deobar nü agiogo.
Canada Ato Kilonser, Justin Trudeau aser EU Tir, Donald Tusk; European Commission lenisang, Jean-Cladude Juncker aser Slovakia Ato Kilonser, Robert Fico nungeri Comprehensive & Economic Trade Agreement (CETA) tezüngzükepji yashi zülutepa agi.
CETA tezüngzüktepji taoba Brehostibar nü zülutepa agitsü asoshi mezüngbo renem saka Belgiuim kübok nütsüng yongsük nisung million 3.6 shi alir Wallonia region-i iba tezüngzüktep agizüktsü memulungi aruba yong iba tezüngzüktepji yashi ang takok ngua agia liasü.
Tan CETA tezüngzüktep agiba ajanga Europe nunger nisung million 500 aser Canada nunger nisung million 35 shi nem mapa inyaktsü tajangzük ngudaktsüba den par rongsenren jenjanga tajungba akümtsü teimla lir.
EU nung züngsemba linük 28 pronglai onük agizükba sülen ang EU-i tezüngzüktep ajunga agitsü lateta lir aser CETA mapatong takok ngua inyaktsü atema Belgium linük ajungai tezüngzüktepji agizüktsü nungdaka liasü.
Tan tezüngzüktep agiba sülen Canada aser EU na tsüngda shishilembatsü sarua noklang nung shilem 99 tashi agientsü renemogo.
Ano, CETA tezüngzüktep agiba ajanga EU aser Canada na tsüngda kümshi dollar sen billion 13.2 jenjang aketba shishilembateptsü aser iba ajanga nüburtem nem mapa inyaktsü lenmang lapoktsütsü renema lir.