EU, China, Australia-i India-Pak dang atsüayongtsü mepishir

New Delhi, February 26 (Agencies): Mongolbar anepdang züngia India-i IAF tayimtsü ajanga Pakistan kübok Balakot nung kiralongrartem amakba sülen alima linüktemi India aser Pakistan naprongla na dang aremzüka atsüayongtsü mepishiogo.
February 14, 2019 nü JeM kiralongrar kati gari ka nung bomb aika bener CRPF sepaitem convoy bus nung tsükokja amakba lendong nung CRPF sepai 40 asü, aser tanep India-i ibaji mangyangogo.
Tanep India-i Balakot nung Jaish-e-Mohammed kiralongrartem camp amakba sülen alima linüktemi tebilemtsü kaa India dang atsüayongtsü mepishi.
Tayimtsü amshia kiralongrar camps amakba sülen European Union (EU)-ia India aser Pakistan naprongla dang pei tashi azüoktsü asüngdang.
Ano Australia sorkaribo Pakistan dang parnok litsü nung aliba kiralongrartem telok anema inyaktsü metetdaktsü.
Sangdong ka ajanga Australia sorkari, “Pakistan-i akokba tashi Jaish-e-Mohammed anema inyaktsüla. Parnoki (Pakistan)-i parnok litsü nung joko kiralongrar teloktem memelatsüla,” ta metetdaktsü.
“Pakistan-i parnok litsü nung kiralongrar teloktem anema inyaktsüla, item rongnung tawa February 14 nü bomb amshia amaker telok Jaish-e-Mohammed aser Lashkar-e-Taiba densema lir,” ta parnokisa metetdaktsü.
Australia-isa India aser Pakistan nati azüoktsüla aser atsüanemtsüla, ta ashi.
Balakot nung tayimtsü ajanga kiralongrartem camp amakba dak sendakba osang Foreign Secretary, Vijay Gokhale-i USA, UK, Russia, Australia, Indonesia, Turkey aser Asia nung aliba linük trok nem metetdaktsüogo.
China-ia India dang, iba ama tongtibang mapang ka nung tashi azüoka amshitsüla, ta ashi.
Beijing nung osangbenertem den jembidang Chinese Foreign Ministry otongar, Lu Kang-i, tang atalokba osangtem ozü linüki angazükogo, ta ashi.
Wang-i, “India aser Pakistan naprongla ya South Asia nung tongtibang linüktem lir. Linük ana tsüngda tesendaktep aser amalitep ajanga South Asia nung yimjung aser azükaru alitsü,” ta ashi.