EU-i Air Passenger Data lemsateptsü: Schneider

Brussels, December 05 (Agencies): European Union (EU) nung züngsemba linüktem rong nung tayimtsü nung senzüsenponger nisungtem indang osangtsüsang lemsateptsü tezüngzüktep ka EU’er Interior Minister-temi agiba osang ka Luxembourg Interior Minister, Etienne Schneider-i yashi Hokolbar nü metetaktsüogo.
EU nung züngsemba linük 28 nungi Interior Minister-temi yashi Brussels yimti nung amenba EU Interior Ministers Summit senden iba tezüngzüktepji agi ta pai osang jangjashitsü.
Tan tezüngzüktep agiba ajanga EU nung züngsemba linüktem rong nung Passenger Name Records (PNR) osang lemsateptsü lenmang sadema lapoker lir.
Kasa osangji küm 4 shi rizünga ayutsü asoshi tan senden nung shilem agirtemi azüngashiogo.
Tan tezüngzüktep agiba sülen EU nung züngsemba linük tsüngda senzüba tayimtsü den külemi, bendanglen nungi EU-i aruba tayimtsü nung senzüsenpongertem den sentakba osangtsüsang bendena lemsateptsü renemer lir.
EU okatsürtemi mapang talangka olemtepa aruba sülen tan EU nung züngsemba linük rong nung PNR osangtsüsang lemsateptsü tezüngzüktep asangsang nung agir lir.
Kiralongrartem senzüsenpongbaren tali jangjashia parnok mitsü nükjidong nung EU-i tan tezüngzüktepji agiba osang jangjaogo.