EU-i Britain scientist 302 nem senpet agütsü

Brussels, February 12 (Agencies) : European Research Council (ERC)-i 2015 küm atema Consolidator Grant tetoktepba nung scientist 302 tenüng metetdaktsüogo, ta Hokolbarnü European Commission-i metetdaktsü.
Ano scientist matem alirtem parnok 302 nem ya sen euro million 585 ($660 million) agütsüogo. Iba senpet ya European Union (EU)-i ayongba Horizon 2020 sentong dak ajemdaker bushisüngdang aser tongutetba tasentem asoshi agütsüba lir, ta Xinhua news agencies ajanga metetdaktsü.
Nisung shi sen euro million 2.0 teyari agütsüba ajanga parnok bushisüngdangba mapang entokba menoktettsü aser bushisüngdang tasen atema peritsü, ta ERC-i ashi.
“Horizon 2020 dak sentakba nung, alima nung aliba nüburtem ajangzüktsüsa tongutetba tasen ngutetertem nem ERC-i sen ajak tenlar,” ta research, science & innovation nung European Commissioner Carlos Moedas-i ashi.
Tang shimteta aliba scientist temi tashidak aser wara poktetdaktsüba mesen, Zika virus amala nokdangtsü asoshi lenmang ngutettsü, ta ERC-i ashi.
Ibaji dang masü saka parnoki ngutetba iba mapa nung post-doc, PhD students aser bushisündanger tangar ajak sentepa nisung 2,100 tashi inyaktsü maoangka angutsü.