EU-i Burundi linük amokmerener

Bujumbura, February 16 (Agencies): Burundi linük nung tensa mejungi kümdaktsür anema rongsenren tenokdangba sentong tesashiba benokshitsü renemba olen ka European Union (EU) nung foreign minister-temi amokmerena metetdaktsüogo.
Tir, Pierre Nkurunziza-i yaküm, 2015 küm July ita nungi tenzüka Burundi Tir menden tasembenren abentsü tenzükba sülen Burundi nung yimtenren mangatettep ken o tulu adoka tensa mejungi akümba osang bushiteta lir.
EU minister-temi Brussels yimti nung yashi, Hombar nü senden ka amenba sülen Burundi nung yimtenren ken o mebentettsüsa tensa mejungi kümdaktsürtem anema tenokdangba sentong tesashiba benokshitsü telemtetbaji agia liasü.
Tir Nkurunziza pusema tensa mejungi kümdaktsür tongti ketdangser 4 tashi anema EU-i tang tenokdangba sentong benoka lir.
Linük temzüng anema inyaka, Nkurunziza-i tasembenren Burundi Tir menden abentsü alizüng ayuba osang yaküm April ita sangoktsüba sülen Burundi nung tensa mejungi akümtsü tenzük.
Burundi tensa azüoktsü nükjidong nung African Union (AU)-ia par teloktep mitkartem Burundi-i yoka yariteptsü renem saka Nkurunziza-i iba onükji magizüki lir.

You must be logged in to post a comment Login