EU-i Burundi senso 4 anema tenokdangba sentong benoker

Brussels, October 03 (Agencies): Burundi linüki ajurushia aliba yimtenren ken o tamajungba kümdaktsüsa mapa inyakba ken o nung ajemdaker European Union (EU)-i Burundi senso 4 tashi anema rongsenren tenokdangba sentong tanü Honibar nü benokogo.

EU-i tan tenokdangba sentong benokba nisung 4-ji taoba Burundi mitkar general, Leonard Ngendakumana; Deputy Director General, National Police, Godefroid Bizimana; Presidential Administration Cabinet lenisang, Gervais Ndirakobuca aser National Intelligence Officer, Joseph Niyonzima nunger aliba osang jangjaogo.

Ngendakumana-i taküm May ita 13 nü Burundi linük indang yimsüsütsü tashi tashiyim agi agitsü merang saka pai tamakok ngua liasü.

Tanüngba lenirtemi tashiyim amshia longkak aitertem songtemtsü sentong atonga kasaji mapa küma inyakba osang bushiteta lir.

Aji oda, tan tenokdangba sentong benokba sülen par 4 nem EU nung züngsemba linük 28 prongla semdangtsü memelatsü renemba den külemi, parnoki EU kübok densemba lushi nung rongsen bendenba ajunga nokdanga ayutsü asoshi EU-i lemtetogo.

Burundi Tir, Pierre Nkurunziza-i Tir menden tasembenren abentsü nükjidong nung Tir election nung candidate ka ama shilem agitsü lemtetba osang sangoktsüba sülen nüburtemi iba telemtetbaji magizüker ta sayua par yimti yimdong nung taküm April ita 28 nü nungi tenzüka longka aita liasü.

Nkurunziza-i Tir menden tasembenren abentsü lemtetba ajanga par nüburtem rong nung küm 13 tashi tongpang rarabaren anentsüba Arusha tezüngzüktep raksatsür ta shia, Burundi nüburtemi par lenisang anemtsü tenzük.

Ano külen, police aser longkak aitertem na tsüngda raratsü tenzüka par linük tensa mejungi akümba ajanga Burundi nübur nisung 200,000 dak temai par linük toktsür kidangsüa aliba Tanzania aser Rwanda linük na nung jenoka alitsüsa akümba osanga bushiteta lir.

Nüburtemi memulungba den külemi, opposition teloki shilem magitsü lemtet aka sentong renemba ama, election-ji agiba sülen Nkurunziza-i takok ngua taküm July ita nungtu maneni Tir menden abentsü jenjang angu.

Ano külen, Burundi lenirtemi yimtenren ken o benoka jembitepba ajanga par mangatettepbaren bentettsü tajungshiba olen ka United States sorkaria metetdakja lir.