EU-i Hamas o LTTE kiralongrar tarensen nungi agientsü mera agir

Brussels, September 22 (Agencies): European Union (EU) kübok tentetba tematiba okadaki Hamas aser Liberation Tigers of Tamil Eelam (LTTE) telok na EU-i latetba kiralongrar tarensen nungi agientsü mera agiba osang jangjaogo.
Council of EU member states-i 2014 küm benokba Hamas aser LTTE telok na kiralongrar tarensen nung maneni züngoktsü  onük magizüktsü asoshi European Court of Justice nung advocate general, Eleanor Sharpston-i tanü, Brehostibar nü benoka liasü.
Ajisüaka, Israel aser Sri Lanka sorkari iba meraji magizüktsü lemtetba osang ka metetdaktsüogo.
Tan EU okadaki benokba onükji magizüktsü renemba osang ka Sri Lanka sorkari metetdaktsü saka Hamas telok den sentakba onük nung Israel-i par tangatetba mesüra telemtetba tang tashi memetetdaktsüi lir.
LTTE ya Tamil nüburtemi linük tasen ka tentettsü asoshi Sri Lanka sorkar den tongpang raraba telok tetsüti lir aser Hamas telok ya Gaza Strip madak yimsü asüba aser Israel den taoba küm 30 shi tongpang kanga sashia rarar Palestine nunger Islamist telok tongti lir.
“EU lenirtemi bushisüngdang junga magi osang kakettem nung adoktsüba osang nung ajemdaker küm 15 tejaklen nungi tenzüka, Hamas o LTTE telok na kiralongrar tarensen nung inoksema, par telok ana anema tenokdangba sentong benok,” ta EU okadaki tanü  metetdaktsü.