EU-i Paris climate tezüngzüktep atalokdaktsütsü: UN

United Nations, September 29 (Agencies): France yimtiba, Paris nung yaküm, 2015 küm agiba climate tezüngzüktep taruba anogo ishika tsüngda nung mapa küma inyaktsü atema India aser European Union (EU) nati nangzükshiba osang ka United Nations (UN)-i tanü, Brehostibar nü metetdaktsüogo.

Paris nung yaküm December ita amenba climate senden nung alima lenirtemi alima tali tatsükba akümba ajanga tsüngsang mupong balaka küma melenshibaren azüoktsü atema nungdakba maparen inyaktsü nangzüktepa liasü.

Tan India aser EU nati par tenangzükba mapa küma inyaktsü renemba ama asangsang nung inyakra, iba ajanga alima linük 55 den densema, alimai adoktsüba miim tango, greenhouse gas noklang nung shilem 65 shi agi tajemba kümdaktsür asütsü.

Tanü tashi nung alima linük 61 tashi miim tango adoktsüba maparen ajemtsütsü tezüngzüktep agibaren nung shilem agia lir.

“European Union-i par tenangzükba mapa küma inyaktsü renemba osang metetdaktsüogo aser par tenteti nangzükba ama asangsang nung inyakra, ibaji alima tali tatsükba akümbaren azüoktsü tongti mera agir asütsü,” ta UN otongdar, Stephane Dujarric-i metetdaktsü.

Ano külen, UN-i climate change mondang Morocco kübok Marrakech yimti nung taküm November ita 7 nü nungi tenzüka amentsü ayonga lir.