EU-i tenzüktsü renemba mitkar mapatong anemer: Britain

Brussels, September 27 (Agencies): European Union (EU)-i par tentet nung züngsemba linüktem rong nung mitkar amalitep alitsü aser EU mitkar aser mitkar tesepti tentettsü renemba mapatong anemba olen ka Britain-i tanü, Mongolbar nü metetdaktsüogo.

Britain-i brexit ta ajaba EU toktsütsü telemtetba taküm, 2016 küm June ita agiba sülen EU nung züngsemba linüktem rong nung mitkar amalitep alitsü aser mitkar tentet tenteta par tentet tali tashi itshitsü mapatong tenzüktsü atema France aser Germany nati külem Europe linüktem ajungmesotsü tenzükba sülen EU-i tan mitkar mapatongji inyaktsü renemer lir.

“Europe ajunga kümzüka ayutsü atema sabang kijaji North Atlantic Treaty Organization (NATO) dang lir,” ta shia, Britain linüki EU-i taoba mapang benokba züngsem linüktem rong nung mitkar amalitep alitsü mapatong nokdanga liasü.

“EU-i par mitkar telok aser mitkar tesep tentettsü mapatong anemtsü renema lir kechiyong EU mitkar tentet balaka tentetba ajanga NATO aser iba mitkar tentet na aiben tsükteptsüsa tensa ajurutsü,” ta Britain Defense Secretary, Michael Fallon-i metetdaktsü.

Britain-i tan EU-i benoktsü renemba mapatongji anemtsü tenzük aka, par linüki kechisarena ajunga nung kümdangshitsü nungdaka lir kechiyong par linüki EU toktsütsü mapatong asangsang nung inyak tenzükba sülen EU den agitsü anünga aliba tezüngzükteptem par linüki aginüba ama magitettsü akok.

“EU miktar tentet tentettsü nungdaka kümogo. Ozü linüki Germany linük den tesendaktep tajung yanglua lir aser EU mitkar mapatongji taküm küm tatemlen tashi nungbo asangsang nung atalokdaktsütsü alizüng lir,” ta German Defence Minister, Ursula von der Leyen den aroki osangbener den ajurutepdang France Defence minister, Jean-Yves Le Drian-ia tanü metetdaktsü.

Ano külen, “EU-i agiba tezüngzüktep kübok EU mitkar balaka tentettsü temelaba mali. NATO Secretary General, Jens Stoltenberg-i Slovakia kübok Bratislava nung amentsü ayongba EU defense ministers senden nung adentsü renemba ajanga NATO-i EU den aroki lungjemer inyakba kuli tejangja angur,” ta EU foreign policy lenila, Federica Mogherini-ia metetdaktsüogo.