EU-i Turkey den amalitepa migrant khuret benoktsüla: Merkel

Berlin, October 15 (Agencies): Europe-i tang ajurushiba migrant nisungtem den sendakba khuret bentettsü atema European Union (EU)-i Turkey den külemi amalitepa inyaktsü tajungshiba olen ka German Chancellor, Angela Merkel-i tanü Brehostibar nü metetdaktsüogo.

“Pei linük toktsür Europe nung jenoka alitsü apusor migrant nisungtemi Europe nung mezüng tetsüng ajemokdak tongi tesemji Turkey ya lir. Anungji, migrant nisungtem indang taküm tia tajungba kümdaktsütsü asoshi EU-i Turkey sorkar den külemi amalitepa nungdakba maparen inyaktsü ajungshir,” ta lai ashi.

Brussels yimti nung tanü ayonga amenba EU lenirtem senden nung shilem agidang Merkel-i iba tajungshiba olenji metetdaktsü.

Ano külen, EU lenirtemi migrant onük benoka taoba Honibar nü amenba senden nunga Greece sorkari par lushi nung migrant nisungtem jenokdak 5 tashi tentettsü nangzüka liasü.

Turkey linük ama, Greece linük ya Middle East aser North Africa toktsür Europe nung jenoka alitsü apusor migrant nisungtemi Europe nung mezüng tetsüng ajemokdak tongti ka lir.

Aji oda, Greece-i nangzükba ama, migrant nisungtem jenokdak mezüngbubaji Lesbos asetkong kübok Mitilini nung anogo ishika tsüngda nung tentettsü sentong renemba osang angazükogo.

EU nung züngsemba linük ishikati migrant nisungtem jenokdaktsütsü nangzükbaren pela agizükba olen ka metetdaktsüba den külemi, jenokdak tentetba dak atemer, kasaji migrant nisungtem pua ayudak mekümdaktsütsü tekümdangtsü olen ka United Nations Refugee Agency (UNRA)-ia taoba hopta metetdaktsüogo.

Lendong timtem jenti ajuruaka, migrant aser refugee nisung noklang aikati anogoshi Mediterranean Sea ajanga Europe tonga aoba osang bushiteta lir.

Ano, ozüng alema nisung shibelenertem nokdangtsü nükjidong nung EU aser migrant nisungtem jenokba linüktem nem migrant nisungtem aniba rong mittsü melatsü telemtetba ka United Nations Security Council nung züngsemba linük 15-i lemtetba osanga jangjaogo.