EU-i Yazidi tsür nem Sakharov Prize agütsüogo

Brussels, October 27 (Agencies): European Union (EU) kübok European Parliament-i nungtugu Sakharov Prize Iraq nung alir Yazidi tsür ana nem tanü, Brehostibar nü agütsüogo.
Islamic State (IS) kiralongrar telok toktsür ajenba sülen meimchir temeten atema tasüita nokdakba nüngtem nung EU-i Nadia Murad aser Lamiya Aji Bashar na nem 2016 Sakharov Prize-i agütsü.
Murad aser Bashar na ya IS teloki Iraq northwest tsütsü, Sinjar anasa Kocho yimtsüng nungi 2014 küm tashiyim agi pua anir aor Yazidi tsür meyirijang jenti rong nung densemba osang angazükogo.
IS teloki tashiyim agi pua anir aoba sülen par züngsemtemi Yazidi tsürtem rishikangshiba aser tashiyim agi taküm raksatsütsü maparen kanga sashia inyakba osanga bushiteta lir.
Yazidi ya Middle East lima benshiba tamangba yimsü balala meyoktepa amangba tamangba yimsü benshir telok ka lir saka IS teloki Yazidi nisungtemji mojing külemertem ta züngshir.
IS teloki tang arishi küm 23 tain kümer alila, Murad Iraq kübok Mosul yimti nung tashiyim agi pua ayu saka lai 2014 küm November ita IS telok nungi jenteta, refugee jenokdak ka mezüng jenokba sülen Germany tonga ao.
Iba mapang nungi tenzüka, Murad-i Yazidi nisungtem, refugee aser tetsür temeten atema kanga sashia nokdakba den, ozüng alema nisung shibelenshiba anema ola kanga sashia adoktsü tenzüka lir.
Lai United Nations Security Council (UNSC) nung ozüng alema nisung shibelenba khuret benokba den tamangba yimsü, kin kidong aser tangatetba nung ajemdaker nisung tepsetba lendong ajururtem yaritsü nükjidong nung taoba September ita Nadia’s Initiative tentetogo.
Ano, tang arishi küm 18 tain alila, Bashar-a  kasa mapang nung IS teloki tashiyim agi apuba sülen lai IS nungi 2015 küm March ita jentet saka lai nüchiso bushia ajendang ali telung nung rema yutsüba landmine bomb ka nung ajemshia, lendong ajuruba sülen la tenük külen apokba den la tejaka kanga mejungi yiru.
Bashar-a tang Germany nung jenoka alir aser laia külem Yazidi nisungtem temeten atema nokdakba osang bushitetogo.
Sakharov Prize for Freedom of Thought sempet ya EU-i Russia nunger scientist, asür Andrei Sakharov nüngtem nung tetemsü nisungtem nem kümshi agütsüba nungtugu sempet ka lir.
Iba sempet ya 1988 küm nungi tenzüka, meimchir temeten atema kanga sashia nokdakba nisung aser tentettem nem agüja arur.