EU linük ajungai migrant-tem anioktsüsa akümtsü: Germany

Berlin, September 18 (Agencies): European Union (EU) nung züngsemba linük 28 pronglai tang Europe tonga aliba migrant nisungtem pei linük anioktsüsa akümtsü ta Germany Foreign Minister, Frank -Walter Steinmeier-i tanü Hokolbar nü metetdaktsüogo.

“Pei linük toktsür Europe nung jenoka alitsü asoshi Europe tonga aliba migrant nisungtem den sentakba khuretji Germany, Austria, Sweden aser Italy nunger kija mebentettsü,” ta shia, EU nung züngsemba linük 28 pronglai migrant nisungtem den sentakba khuret aroki abentsü asoshi vote agi sentonga ayongzüka agitsüsa akümtsü akok ta pai ashi.

EU nung züngsemba linük 28-i kechisarena ajunga nung lenji oa amalitepa inyaker ajisüaka, parnok rong nung tangatetba balala adokra, kasaji bentettsü asoshi vote agir aser iba sentong nung vote noklang nung vote 55 anguba telemtetbaji agizüka kasaji mapa küma inyaka arur.

Hungary, Poland, Czech Republic aser Slovakia nunger densema Europe anüdoklen tentetba linük aikati tang Europe-i ajurushia aliba migrant nisungtem den sentakba khuret aroki abentsü asoshi memulungi lir.

Parnok rong nung tangatettep kati arutsü nükjidong nung EU interior minister-temi tan Hombar nütu senden ka amen saka senden nung shilem agir aikati tang Europe tonga aliba migrant nisung 120,000-ji pei linük sasep lemshir anioktsü asoshi benokba onük magizüki telemtetba tajung magitetba osang jangjaogo.

Ano külen, migrant nisungtem den sentakba khuret bentettsü nükjidong nung Germany o Austria nati ayonger külen Brussels nung EU senden ka taruba Bodbar nü amentsü renema lir.