EU linüktemi Europe nung jenoktsü meranger khuret abentsü ajungshir: Merkel

EU linüktemi Europe nung jenoktsü meranger khuret abentsü ajungshir: Merkel

Germany Chancellor, Angela Merkel-i küm shi mei mapang osangbener den ajurutepba sentong nung shilem agitsü asoshi Berlin yimti tonga aoba noksa ka yangi angur. (Berlin, August 31)

 Berlin, August 31 (Agencies): European Union (EU) nung züngsemba linüktemi Europe nung ozüng alema jenoktsü meranger den sentakba khuret aroki lemsatepa abentsü tajungshiba olen ka Germany Chancellor, Angela Merkel-i tanü Hombar nü metetdaktsüogo.

“Europe ajungai ka küma lungjemer külen, Europe nung ozüng alema jenoktsü meranger den sentakba khuret aroki abentsüla. Europe-i iba mapatong ya takok ngua meinyaktetra, Europe-i meimchir temeten asoshi nokdaka aruba maparen ajunga amajok akümtsü,” ta lai ashi.

Pei linük toktsür Europe nung ozüng alema jenoktsü meranger bendangertem timbaka Germany-i par linük jenokdakja aliba osang bushiteta lir.

“Linük kati linük tanga ka aitsütsü nungdak madoker. Ajisüaka, EU nung züngsemba linük 28-i Europe nung jenoka alitsü meranger den sentakba khuret külemi lungjemer abenba ajanga linük shia atema khuretji tebongpaba akümtsü,” ta Merkel-i shisem.

Ano külen, English Channel ajangdanga Britain-i aotsü nükjidong nung France kübok tzüyimkümlen Calais yimti tezülen jenoka alirtem yaritsü asoshi EU-i France sorkar nem dollar sen million 5.6 teyari agütsüba osanga jangjaogo.

EU aser France ketdangsertem den külemi Calais semdangdang European Commission Tatong Tir, Frans Timmermans-i France sorkar nem teyari sen agütsüba osangji sangoktsü.

Tan agütsüba teyari senji amshia Europe nung jenoktsü meranger 1500 shi jenokdaktsütsü asoshi Calais nung jenokdak tasen ka tentettsütsü sentong aliba osanga pai jangjashitsü.

You must be logged in to post a comment Login