EU memelenshira ‘Frexit’ ajurutsü: Macron

Paris, May 01 (Agencies) : Tan France Tir election nung far-right party nungi candidate, Marine Le Pen dang nungi shilem 20 agi jenjang tajungba alisang, independent party nungi candidate Macron ya Europeon Union (EU) meimer aser pusema nungiter nisung tejangja ka lir.
Ajisüaka taruba Deobarnü linük Tir election shilem tanabuba agitsü lia Macron-i, Brussels nung inyakyim shitak masüba ajanga France dak kongshir, ta tuteta ashi.
“Ni EU nungiter nisung ka lir, ni election nübuyim mapang nunga EU tebilemba aser inyakyimtem wazüka aser kümzüka yua liasü kechiba süra EU ji France asoshi kanga tongtibang,” ta pai osangbenertem dang ashi.
“Ajisüaka tensa den chiteptsü nüngdak aser nüburtemi ashiba angatsüla. Nüburtem tang ya kanga mepelar aser koda mesüi kümogo. EU-i teinyaktsü tim meinyakba ajanga item ya ataloker,” ta paisa ashi.
May 7, 2017 nü Marine Le Pen-i election nung takok ngua Tir aküm nungbo lai France ya EU nungi atsüngtsü. Anungji European Union aser asen European project asüngsashitsü nüngdak, ta Macron-i ashi.
Brussels-i tang ama yasa inyak nungbo asenok ashioktsütsü. Ni yamaji mesüdaktsüner. Kechiba süra asüng yanü asenoki ‘Frexit’ ajurutsü, ta pai shisem.
Le Pen-i EU nung adentsü madentsüji vote ajanga lemtettsü metetdaktsüogo aser iba den külemi immigration tsütsü temelenshi tesashi ka agitsü shiogo.
Lai tang tashi nung yimtsüngtem nungi vote timba nguteta lir.