EU Parliament Tir menden toktsütsü: Schulz

Brussels, November 24 (Agencies): Germany nunger yimsüsür, Martin Schulz-i European Union (EU) Parliament Tir menden toktsütsütsü lemtetba osang ka tanü, Brehostibar nü metetdaktsüogo.
“Taruba 2017 küm agitsü ayongba Germany general elections nung candidate ka ama toktepa shilem agia, ozü Germany’er yimtenren sabang nung tanaben tetsüng ajemoktsü nükjidong nung ni EU lenisütsü menden toktsütsü lemtetogo,” ta pai osang jangjashitsü.
Schulz-i Social Democratic Party (SPD) yimtenren telok tenüng nung election nung tokteptsü renemba osang angazükogo saka pai Germany Chancellor, Angela Merkel den tokteptsü asü metokteptsü iba osangbo tang tashi angazüka mali.
“Ni EU Parliament Tir menden tasembenren abentsü atema candidate ka ama tokteptsü tebilemba mali. Ni EU lenisütsü kümsük tembangba sülen EU lenisütsüren toktsür, ozü SPD telok lenisang ama German Bundestag menden atema North Rhine-Westphalia nungi election nung tokteptsü alizüng lir,” ta arishi küm 60 tain Schulz-i Brussels yimtiba nung osangbener den ajurutepdang metetdaktsü.
“Ni EU Parliament Tir menden abentsü maongka tulu ngua aruogo aser EU tenzüktsü sabang toktsütsü telemtetba kanga saka agiogo,” ta 2012 küm nungi tenzüka EU Parliament Tir inyaksang, Schulz-i shisem.
Taruba 2017 küm agitsü ayongba general election nung Merkel den toktepdaktsütsü atema SPD teloki Schulz par candidate shimtsü terenemshiba aliba osanga angazükogo.
Ano, Germany Tir tasenba atema shimtsü renema alisang, Foreign Minister, Frank-Walter Steinmeier melenzüka, Schulz Germany Foreign Minister tasenba kümdaktsütsü akok.