EU Tir, Tusk-i Turkey semdangtsü

Brussels, March 01 (Agencies): European Union (EU) Tir, Donald Tusk-i tan hopta Turkey semdangtsü sentong renemba osang ka par office-i tanü Mongolbar nü metetdaktsüogo.
Pei linük toktsür Europe nung jenoka alitsü merangba migrant nisungtem den sentakba Brussels Summit amenba jakdang Turkey lenirtem den migrant nisungtem den sentakba onük benoka jembitsü nükjidong nung Tusk-i Turkey semdangtsü sentong renemer lir.
Toaba hopta Balkans tesem semdanga senzüba sülen Tusk-i tan Turkey linüka semdanga par Ato Kilonser, Ahmet Davutoglu den tan Brehostibar nü aser par Tir, Recep Tayyip Erdogan den tan Hokolbar nü ajurutepa senden amentsü sentong renemogo.
EU nung züngsemba linük 28 nungi lenirtemi Brussels nung tan March ita 7 nü amentsü ayongba senden atema renemshitsü nükjidong nung Tusk-i Turkey lenirtem den ajuruteptsü sentong renemba osang jangjaogo.
Tusk aser European Commission lenila, Jean-Claude Juncker nati yaküm 2015 küm November ita Turkey semdangdang Erdogan-i tena amokmerenba densema, migrant nisungtem den sentakba ken o nung Turkey aser EU na tsüngda tesendaktep mejungi akümtsü tenzüka lir.