Euro 2016 nung Goal-Line Technology amshitsü: UEFA

Nyon, January 22 (Agencies): Union of European Football Associations (UEFA)-i France nung asayatsü ayongba Euro 2016 asayamong nung goal-line technology amshitsü lemtetba osang ka UEFA lenisang, Gianni Infantino-i tanü Hokolbar nü metetdaktsüogo.
“Goal-line technology kanga junga tendangba sülen kasaji Euro 2016 asayamong nung amshi tenzüka Champions League nunga amshitsü lemtetogo,” ta pai ashi.
Iba technology ya Britain nung ayongba English Premier League (EPL), Italy nung asayaba Serie A, Germany nung ayongba Bundesliga aser France nung asayaba Ligue 1 densema alima tesem balala nung ayongba tongti football asayamong balala nung amshiba osang bushiteta lir.
Alima ajunga nung football asayatsüren ketdang asür, FIFA-ia Brazil nung ayonga asayaba 2014 World Cup asayamong nung iba technology takok tulu ngua amshiogo.
“Taküm June ita 10 nü nungi July ita 10 nü tashi asayatsü ayongba Euro 2016 nung goal-line technology amshiba ajanga tajangzük tulu angutsü imlar,” ta Europe ajunga nung referee tajungtiba ta züngoksang, Pierluigi Collina-ia metetdaktsüogo.