Euro 2016: Portugal teloki final asayatsü

Lyon, July 07 (Agencies): Portugal nunger football asayar mongin, Cristiano Ronaldo densemba Portugal teloki goal 2-0 agi Wales telok madak takok ngua, tang tasayadak Euro 2016 final asayatsü jenjang yashi, Bodbar nü nguogo.
Yashi asaya nung Real Madrid asayar, Ronaldo-i par telok asoshi 1 buba goal agütsüba den külemi, pai yaria par teloki 2 buba aser takokba goal agüja liasü.
Tan asayamong nung imlaba ama goal magütsütetba atema nüburtemi aitsütsü tenzüka alisang, Ronaldo-i yashi asaya tenzüker minute 50 buba nung pa tekolak agi ball tongokja par Portugal telok asoshi 1 buba goal agütsü.
Tan goal agütsüba ya Ronaldo-i tan asayamong nung 3 buba goal agütsür lir aser iba goal takok ngua agütsüba sülen pai Michel Platini-i yangluba European Championship finals nung goal 9 tashi agütsüba otsü menepogo.
Ano, yashi asaya tenzüker minute 53 buba nung Ronaldo-i metsüoktsüba ball agizüka, külem asayar, Nani-i par Portugal telok asoshi 2 buba goal agüja par telok nem takok ngudaktsü.
Portugal teloki tanabuba semifinal asaya nung takok angur, France mesüra Germany na rong nung ka den final asayatsü.
“Tan final nunga takok angutsü imlar. Ni ozü Portugal telok asoshi takok marok agizüktsütsü mangdang akidang nungi yua lir aser tan final asaya akokba ajanga kü mangdang asangsang nung ataloktsü,” ta Ronaldo-i asaya tembangba sülen metetdaktsü.