Euro 2016: Slovakia-i goal 2-1 agi Russia akok

Lille, June 15 (Agencies): Slovakia teloki goal 2-1 agi Russia madak takok ngua tang tasayadak Euro 2016 football asayamong nung tan mezüngsüa, tanü, Bodbar nü takok ngua shilem agiogo.
Tanü asaya tenzüker minute 32 buba nung Vladimir Weiss-i goal 1 agüja par Slovakia telok temaba jenjang nung ajungkettsüba sülen Marek Hamsik-ia asaya mezüngbuba shilem tembangba mapang nung tanabuba aser takokba goal agüja par Slovakia telok nem takok ngudaktsü.
Denis Glushakov-ia asaya tenzüker minute 80 buba goal 1 agütsü saka par Russia teloki Group B asaya nung tamakok ajurutsüsa jenjang angu.
Ano külen, Real Madrid telok’er tongti asayar, Cristiano Ronaldo-i aniba Portugal telok aser Iceland telok na tsüngda asayaba Group F asaya goal 1-1 draw nung tembangba osang jangjaogo.
Yashi asaya tenzüker minute 31 buba nung Nani-i par Iceland telok asoshi goal 1 agütsü saka asaya tenzüker minute 50 buba nung Birkir Bjarnason-i par Portugal asoshi goal 1 agütsüba yong par telok anaprongla kasa jenjang kümdaktsü.
Tesülen, tanüngba asaya mapang nung telok anapronglai goal ka danga magütsütetba yong par asaya draw nung tembanga liasü.
Portugal teloki par taruba asaya Austria den Paris nung asayatsü aser Iceland teloki Hungary telok den Marseille nung tan Honibar nü asayatsü lemzükogo.