Euro 2020: Croatia aser England na round of 16-i iogo

Aami/June 23, 2021 (Agencies): Euro 2020 asayamung nung Mongolbarnü Group D asaya nung Croatia-i goal 3-1 agi Scotland koka round of 16-i iogo.

Arishi küm 35 tain Croatia captain Modric-i asaya tenzüker minute 62buba nung goal ka idaktsüba ajanga par telok nem takok agütsüogo. Iba asayamung ya Modric atema tatembangbuba asayamung asütsü. Modric ya Croatia atema European Championship nung goal idaktsürtem rongnung tanobusang aser tambusang kümogo.

Pai 2008 küm arishi küm 22 asüba mapang Austria den asaya nung goal ka idaktsü aser Mongolbarnü arishi küm 35 nung pai goal ka idaktsüogo.

Croatia atema tanungba goal ana ya winger Nikola Vlasic-i minute 17buba nung aser Ivan Perisic-i minute 77buba nung idakja liasü.

Scotland atema Callum McGregor-i asaya mezüngbuba shilem madem tsüngda goal ka idakja liasü.

Kasa mapang nung Mongolbarnüsa England-i Group D asaya ka nung goal 1-0 agi Czech Republic koka Group D takoker ama parnoka round of 16-i iogo, aser Czech team-a round of 16-i iogo.

Asaya tenzüker minute 16buba nung Sterling-i England atema goal ka idaktsü aser goal ka yagi parnoki asaya akok.

England team taruba asaya Wembley nung France, Germany mesera Portugal den asayatsü aser Czech team-a iba telok nungi takoker den asayatsü.