Europa League: Rooney-i otsü yanglu; United-i takok angu

Manchester, November 25 (Agencies): Wayne Rooney-i goal takok ngua agüja, kanga junga asayaba ajanga par Manchester United teloki goal 4-0 agi Feyenoord Rotterdam telok madak takok ngua, Europa League football asayamong tatembangba asaya 32 nung shilem agitsü jenjang yashi, Brehostibar nü ajangzüktsüogo.
Rooney-i yashi asaya nung goal takok ngua agütsüba sülen Europe nung goal 39 buba agütsür asayar küma, Ruud van Nistelrooy-i goal 38 agüja yangluba par United telok tenüng nung Europe nung goal timtiba agütsüba otsü ajangteta liasü.
Ajak agi goal 249 tashi agüja, par United tenüng nung goal timtiba agütsüba otsü yanglusang, Bobby Charlton-i yangluba otsüa meneptsü atema Rooney-i goal 1 dang takok ngua agütsütsü anünga lir.
Yashi asaya nung Rooney den yaritepa, külem asayar, Juan Mata aser Jesse Lingard nati goal kaka agütsüba den Feyenoord goalkeeper, Brad Jones-i memeteti pasasa pei telok goalpost telungi ball idakja, goal agütsüba ajanga United teloki goal 4-0 agi takok ngua liasü.