Europe ajunga lungjema alitsü ayongzüker: Hollande

Paris, September 16 (Agencies): Europe ajunga tali lungjema alitsü tayongzükba olen ka France Tir, Francois Hollande-i yashi, Brehostibar nü metetdaktsüogo.
Britain-i brexit ta ajaba European Union (EU) toktsütsü lemtetba sülen par linük medeni Europe-i tarutsü mera agitsü nükla tajung bushiba mapang ka nung migration, tensa azüoktsüren aser EU dak temulung melemteti akümba onüktem nung EU nung züngsemba linüktem rong nung tebendang adoka, parnoki makmakshimak tia ajurutsü tenzüka lir.
“Asenoki Europe indang tarutsü nükla tejangja ayutsü nungdaker,” ta Slovakia yimtiba, Bratislava nung European Union senden amenba jakdang Hollande-i sangoktsü.
Hollande den pusema, Germany Chancellor, Angela Merkel-ia EU linüktem tali lungjema alitsü tajungshiba olen ka sangokja liasü.
“Asenoki ajurushiba tensa tamajung akoktsüsa asenok lungjema alitsü nungdaker,” ta Merkel-i Hollande den aroki France yimtiba, Paris nung osangbener den ajurutepdang ashi.
“Tensa azüoktsüren, kiralongrar anema raratsüren aser terenlok alitsü sabangtem nung EU-i tongti shilem agitsü nungdaka kümogo,” ta lai shisem.
“EU-i taruba ita ishika tsüngda nung temelenshi tajung magira, EU tenteti tanaben memelenshitettsüa tia tamajung ajurutsü,” ta Italy Ato Kilonser, Enrico Letta-ia tawa metetdaktsüba osang jangjaogo.
Europe nung jenoka alitsü meranger migrant aser refugee nisungtem junga anepalu masüba ken o nung ajemdaker Hungary linük EU nungi agientsü asoshi Luxembourg foreign minister-ia tawa sangokja liasü aser iba ajanga EU nung züngsemba linüktem rong nung tebendang adoktsü tenzükba kuli tejangja ngua liasü.
Britain-i taküm June ita brexit telemtetba agiba sülen EU tali tashi itshitsü nükjidong nung EU nung züngsemba linüktemi satellite surveillance densema, mitkar osettsüset yanglutsü aser alizüktsü maparen aroki lungjemer inyaktsü tayongzükba ka France aser Germany nati tan hopta tetenzüklena metetdaktsüogo.