Europe Arogo ajaki ‘refugee’ anioktsüla: Pope

Vatican City, September 6 Agencies): Deobar nü Pope Francis-i, Europe nung Catholic Arogo ajaki refugee kibongtem anioktsüla, aser Vatican nung aliba Arogo anati mezüng iba tatishitsü sayutsüla, ta ashi.
‘Jubilee Year of Mercy’ December ita nung amungtsü sentong lia Pope-i Europe nung Arogo ajaki, tamangba yimsü balala amanger ajaki aser lokti ajaki item kibong ka kabosa anioka tatishitsü tajung sayutsüla, ta ayongzüka liasü.
“Taküm tasen tenzüktsü teimla nung nisung meyirjang aika rara aser yasa tsüra nungi jena arua lir. Laishiba-i timtemer aser tilartem den yariteptsü shia lir,” ta Pope-i ashi.
Tebang kisüng agi, tasü itang mesüra aremzükang ta ashiba dang masü saka mapa adentsüla, ta Francis-i nisung meyirjang aika sendena lia ayimoktsü.
Vatican-i anir iba mapa tajung inyaktsüla ta ashiba mapang, tarutsü mapang nung Vatican Arogo ana nung refugee kibong ka ka anioktsü, ta pai ashi.