Europe: FB ajanga tangar anema jembiba nokdangtsü mapatong ka tenzükogo

New York, January 19 (Agencies): Europe nung tanga linük nungi timtema arua jenokba nisungtem agi sünga aliba mapang ka nung online ajanga kin o kin anemtepba o aser sembatepa anema jembiba nokdangtsü asoshi kecha meinyaker ta ashiba anentsütsü asoshi Facebook-i mapatong tasen ka tenzükogo. Iba mapatongi social networking website ajanga Eurpoe nung magizüktetba o amshia tangar den jembiba nokdangtsü.
Iba mapatong dang “Online Civil Courage Initiative” ta ajar aser iba mapatong ya Berlin nung amenoker tenzük koba German Ministry of Justice & Consumer Protection-ia nungiter, ta Mongolbar nü Financial Times osang ajanga ashi.
“O kar langzütsü atema nai bilemba aser otsü kar melemsatep tsüngda ken kanga junga bilemdangang. Online ajanga anemtepba ya melenshitsü atema nisung shiai angtettsü nüngdaker,” ta Facebook home page nung shia lir.
Facebook-i ashiba agi, parnoki Europe nung iba mapatong den yaritepdaktsütsü asoshi NGO-tem nem euro sen million ka agütsütsü aser parnoki online ajanga raratepertem aser o tamajung lemsatepertem den raratsü.
“Facebook ya tesembatep o lemsateptsü mesüra kati ka lutsütepa rarateptsü atema lapokba masü. Tan mapatong tasenba ajanga asenoki internet nung o tamajung jembiba tsütsü kanga junga angatettsü,” ta Berlin nung iba mapatong tenzüktsüdang Facebook chief operating officer, Sheryl Sandberg-i ashi.
London nung aliba shisalen tuyur ‘Institute for Strategic Dialogue’-i ketdangsüa iba mapatong ya inyaktsü.
Iba mapatong ya Facebook, ‘Institute for Strategic Dialogue’, Amadeu Antonio Foundation aser International Centre for the Study of Radicalisation & Political tentettemi lokteper tenzüker lir.
Online ajanga o tamajung shitepa aser kin kati kin tanga ka anemtepba dak sentakba nung Facebook-i kecha meinyaker, ta taoba mapang jembiba osang angazükogo.
Facebook nung o tamajung kar meindokba ken o nung ajemdaker Germany nunger obendangertemi Europe nung alir Facebook tekolakba bushisüngdangtsü tetuyuba ka yaküm November ita agüja liasü.