Europe-i Kurd telok nungitba ajanga kiralongrartem yarir: Erdogan

Ankara, November 07 (Agencies): Europe-i Kurd kin-i tentetba Kurdistan Workers’ Party (PKK) telok nungitba ajanga kiralongrartem yaria parnok jenjang tajungba kümdaktsüba aitsüba olen ka Turkey Tir, Tayyip Erdogan-i yashi, Deobar nü metetdaktsüogo.
“Europe kübok tentetba linüktemi ozüng alema inyaktsü ajungmesoa, kiralongratsü nungita pusemer. Ozü linük densema, alimai PKK telok ya kiralongrar telok ka ama züngshir saka Europe-i par telok maneni yariba kuli angur kechiyong parnoki PKK züngsemtem nem tetsükdaktsü aser tetsübo kecha meli Europe ajunga nung senzütsü temeten agütsür,” ta Erdogan-i kanga jashia ashi.
“Europe-i tashiyim agi yimsü asür lenir ka ta ni züngok aka, ni aser ni aniba Turkey sorkari PKK aser par telok pusemer ajunga meshimeshi mesamatsü tashi par telok anemtsü renema lir,” ta pai shisem.
Turkey sorkari PKK telok den sentaktepba ken o nung ajemdaker Kurd kin nüburtemi tentetba Kurdish HDP yimsüsürtem pua parnok taoba Hokolbar nü tepuokdak puokba sülen alima ajungai Turkey sorkar aitsütsü tenzüka lir.
Kurdish HDP telok ya Turkey nung tentetba opposition telok tulutiba tarensen nung tanabuba jenjang abenba tongti yimtenren telok lir.
“Kiralongrar ama alir aser inyaker parliament yimsüsürtema kiralongrar ama züngshia, aibelener nem tapet temerenshi agütsütsü,” ta shia, Tir densema, Turkey nübur aser yimsüsür shingaia Turkey temzüng ozüng alema inyaktsü temeten ngua maliba olen ka Erdogan-isa metetdakja liasü.