Europe-i migrant nisungtem nokdangba maparen bilemdangtsüla: Ban

Vienna, April 28 (Agencies): Europe-i migrant nisungtem par lushi telungi maitdaktsüi nokdangba maparen bilemdangtsü olen ka United Nations (UN) Secretary General, Ban Ki-moon-i tanü, Breshostibar nü sangoktsüogo.
“Migrant nisungtem nokdangba ajanga Europe-i tarutsü anogotem nung alimar temzüng ozüng benshitsü maparen nung tetsükba ajurutsü akok,” ta Austria’er parliament lower house nung onük jembidang Ban-i tanü metetdaktsü.
“Tongpang rarabaren, nübur nem agütsüba temeten anema inyakba aser aibelenba kuli makai tai maketba nisungtem rishikangbaren nungi taküm kümzüktsü nükjidong nung pei talikdak toktsür bendanglen jenoka alitsü meranger migrant  nisungtem yaritsü ocet alima aser Europe nati latetba temzüng nung densema lir,” ta pai osang jangjashitsü.
Austria’er kibok tensa mejungi mekümdaktsütsü nükjidong nung par linük jenoktsü meranger migrant nisungtem magizüktsü telemtetba ka Austria’er upper house yimsüsürtemi agitsü renemba anogo nung Ban-i iba olenji lemsateper lir.
Aji oda, Austria’er yimsüsürtemi par telemtetbaji asangsang nung agia, telemtetbaji ozüng küma latetra, yaküm, 2015 November ita nungi tenzüka par linük jenoka alitsü asoshi tenüng benokba migrant nisungtemi mapang tatsüka asoshi Austria nung jenoka alitsü temeten angutsü.
Ajisüaka, küm 3 süir külen parnoki toktsüba linük nung tensa junga akümba osang bushitetra, Austria nung jenoker migrant nisungtemi pei pei linüki tanaben shilanga aotsüsa akümtsü.