Europe-i refugee den sentakba khuret lemsatep abentsüla: Juncker

Germany toktsür aonung tepiyong bus nung jajaba sülen Iraq nunger Wissam Ahmed (Abelen)-i tang Europe tonga aliba külem refugee nisungtem den külemi Paris anülulentip tsütsülen, Champagne-sur-Seine tanü Bodbar nü atongba noksa nung angur. (Champagne-sur-Seine, September 09)

Brussels, September 09 (Agencies): Europe-i tang ajurushia aliba pei linük toktsür Europe nung jenoktsü merangba refugee nisungtem den sentakba khuret lemsatepa abentsü tajungshiba olen ka European Commission Tir, Jean-Claude Juncker-i tanü Bodbar nü sangoktsüogo.

“Greece, Italy aser Hungary nunger kisüngi refugee den sentakba khuret ya takok ngua mebentettsü,” ta shia, tang Europe tonga aliba refugee nisung 160,000 den sentakba khuret ya Europe nung tentetba linüktemi lemsatepa abentsüla ta pai ashi.

World War II mapang ajuruba ama, Europe-i tang ajurushia aliba refugee den sentakba khuret ya Europe ajungai lemsatepa abentsü tasa kar Juncker-i tanü France kübok Strasbourg nung amenba European Parliament senden nung benoka liasü.

“Tang Europe tonga alir refugee nisungtemi par linüki tanaben meyipa maotsü. Aseni Islamic State (IS) kiralongrar anema rarar. Anungji, Syria densema IS teloki lendong kanga sashia atalokdaktsüba linüktem toktsür Europe tonga arua aliba nüburtem yaritsüjia asen arok khuret asütsüla,” ta pai ajungshia ashi.

Aji oda, Greece, Italy aser Hungary nunger den külemi, Britain, Ireland aser Denmark dak alaka tanüngba European Union (EU) nung züngsemba linük 22-i refugee nisung 160,000-ji kasa küma lemzüka pei linük jenokdaktsütsü onük Juncker-i tanü benok.

Ano külen, Juncker-i benokba refugee nisungtem kasa küma lemsar EU linüktem nung jenokdaktsütsü tasaji mapa küma inyaktsü olen ka Germany Chancellor, Angela Merkel-ia Berlin nungi tanü metetdaktsüogo.