Europe-i refugee khuret tekaraba mapang nung bentettsüla: Craig

Los Angeles, September 10 (Agencies): James Bond film nung Bond ama tongti shilem agir, Daniel Craig; Downfall actor, Bruno Ganz aser Oscar sempet agizükba film director ana, Susuanne Bier aser Michael Haneke nunger densema Europe nung tentetba film sabang nung tongti shilem agir nisung 3000 shi tang Europe-i ajurushiba refugee nisungtem den sentakba khuret tekaraba mapang nung bentettsü onük tezüluba nung benokogo.

Syria toktsür Europe kübok Greece bushia rubber agi yangluba rong ka nung mener aodang tetsü aser teti na den külemi Turkey tzüyimkümlen tzüyim nung arükseta asüang, arishi küm 3 tain Kurd nunger tebur chanu, Aylan Kurdi tasümang tzüyimküm nung zükdaka aliba noksa alima ajunga nung taoba hopta prokshiba sülen Europe indang film industry nung tongti shilem agirtemi iba onükji benokba osang jangjaogo ta Hollywood Reporter-i metetdaktsü.

Parnoki tang Europe tonga aliba refugee nisung meyirijang jenti indang taküm kümzüka pei linük jenokdaktsütsü temepishiba onükji online ajanga benokba osang jangjaogo.

Ano külen, Britain-i par linük refugee nisung 20,000 taruba küm 5 tsüngda nung jenoka lidaktsütsü aser Germany sorkaria refugee nisung million tesadang ka shi par linük nung jenokdaktsütsü lemtetba densema, Europe lenirtemi refugee nisungtem den sentakba khuretji aroki abentsü telemtetba ka tan hopta agia lir.