Europe-i WWII nungi tangazükba agitsü nungdaker: Duda

Warsaw, September 01 (Agencies): Europe-i World War Two (WWII) tongpang nungi tangazükba tajung agitsü nungdakba olen ka Poland Tir, Andrzej Duda-i yashi, Bodbar nü sangoktsüogo.
“Europe ajungai WWII tongpang nungi tangazükba tajung agia, tesüiba mapang inyakba ama, linük tanga ka indang lushi tashiyim agi agitsü memerangtsüla,” ta Russia-i Ukraine ket nungi Crimea peninsula tashiyim agi 2014 küm agiba indang jembia, Duda-i ashi.
Poland yimtiba, Warsaw nung agiba WWII tongpang rarar küm 77 abensaba bilemteta amongba sentong nung onük jembidang Duda-i iba olenji sangoktsü.
Poland’er Baltic tzüyimkümlen, Gdansk nung WWII tongpang raratsü tenzüka, tesüiba mapang, 1939 küm September 1 nü injang mezüng yoktsü tenzük.
Iba tesem nung Poland mitkar telok kati par linük amaktsü tenzükba Germany navy aser airforce mitkartem den hopta ka shi tongpang rara liasü.
“Akidang ama, asen Europe nung chuba yimli aser iba den sentakba tashiyim agi tangar lushi agitsü merangba mapatong tanaben mebenoktsüla. International temzüng ozüng raksadang mesüra tashiyim agi Europe arrtsü latetshidang asenoki mangur ama metoktsütsüla,” ta Duda-i ayongzüka ashi.
Ano külen, tan Bodbar nüsa agiba sentong tanga ka nung Poland linük tenüng nung tongpang rarar tambutisang, Lt. Jozef Zurek arishi küm 107 ajungba nüngtem nung pa nem medal ka aser noklang nok ka sempet ama agüja liasü.