Europe nung rür nangzüka aluba agi nisung 20 asü

London, January 08 (Agencies) : Europe nung rür kanga sashia nangzüka alur aser ano Greece nung aliba asetkongtem den Italy anüolentip tsütsütem nunga rür agi nangbanga lir, ta Deobarnü osangbenertemi ashi.
Italy nung rong aser tayimtsütem mejajadaktsüba den ano Hombarnü anüolentip tsütsü aliba school tem dena melapoktsü akok, ta tzü mopung takzürtemi ashiba BBC osang ajanga metetdaktsü.
Turkey nunga rür agi kanga timtem agütsüdar. Istanbul nung rür yipru kanga sashia aruba ajanga Bosphorus Strait nung rongtema mejajadaktsüi nokdanga ayu.
Poland nung kangasa asükba agi nisung 10 tashi süogo. Russia nung aonung minus 30 degrees Celsius tashi mokonga akümer.
Greece anüdoklentip tsütsü minus 15 degrees Celsius tashi mokonger aser yamaji mokongba ajanga taoba hopta tanga linük nungi arua jenoka alir ka asü aser lenmangtem nung gari mejajateti aküm.
Athens nung freezing point dak nungi talemba makümer aser asetkong jenti rür agi labanga lir.
Greece nung aliba asetkong karbo alima tangalen nungi arurtem jenokdak tesemtem lir aser parnok aika khen atema jenoktsü yangluba ki nung jenokdakja lir, ta BBC osang ajanga metetdaktsü.
Czech Republic nung ketdangsertemi, taküm tsüngküm nung temokongtiba tesemji Prague lir, ta ashidang, temokong agi nisung asem tashi asüba jangjaogo, ta shisem.
Bulgaria nungi osang ka ajanga ashiba agi, Iraq nungi arua jenoka aliba nisung ana linük anüdoklentip tsütsü anüdoklen arem ka nung temokong agi süa aliba angu.
Ano mapang tatsüka maneni iba amaisa mokonga alitsü akok, ta tzü mopung takzurtemi metetdaktsüogo.