EVMs nung tamang makateter, ballot amshitsüla: Akhilesh

Lucknow, April 15 (Agencies): Honibarnü taoba Uttar Pradesh Chief Minister aser Samajwadi Party tongti, Akhilesh Yadav-i, electronic voting machines (EVM) dak tamang mekateter, anungji tarutsü nungbo election mapang ballot papers amshitsüla, ta ashi.
Lucknow nung osangbenertem den jembidang pai, “EVMs nung kodang timtem adoktsü mesüra software agi mapa meinyaktsüar aji shingaia memetet. Gol dak tamang katettsüsa masü. Onoki EVMs nung tamang mekateter,” ta ashi.
“Onoki ballot papers nung noklang shilem nung tamang akar, aser tarutsü mapang nung elections nung ballot paper amshitsüji onok takhangba. EVMs ji jungaka mesüra mejungaka onoki ibaji maginer,” ta paisa ashi.
Akhilesh-i ashiba agi, BJP-i sorkar akumba ajanga nüburtemi parnok ashioktsür ama bilemer.
“Kin aser tamangba yimsü nung ajemdaker tesempa proka election agi. Kin aser tamangba yimsü nem tajangzük agutsütsü ta nangzüka votes angu,” ta pai ashi.
Akhilesh-isa par party indang ita ana membership sentong tenzüktsüogo.
“Iba membership mapatong ajanga onoki SP sorkari inyakba mapatem sangdongtsü,” ta paisa ashi.
Yogi Adityanath-i aniba sorkari state nung aliba district headquarters ajak nung light ghonda 24 agutsütsü, Bundelkhand nung ghonda 20 aser yim ajak nung ghonda 18 agütsütsü nangzükba dak sentakba nung Akhilesh-i, tang agütsüba light power ya SP sorkari tenzükba power sub-stations, transformers aser distribution lines ajanga agütsür; onoki power sector nung aika inyaktetogo, ta ashi.
SP lenirisa, BJP sorkar anema jembitsü atema ano mapang matong, ta ashi.
“BJP sorkari budget benokba aser schemes inyakba mapang nung ang onoki parnok anema nokdaktsü,” ta pai ashi.