Ex-serviceman temi medal arongtsü merangba nokdang

New Delhi, November 11 (Agencies): Bodhbar nü One Rank, One Pension (OROP) scheme atema takhangba agüja army nungi anisüngzüker alirtemi parnoki anguba medals arongtsü merang, ajisüaka Jantar Mantar nung duty noktaker police temi ibaji nokdanga liasü.
Osang ajanga ashiba agi, OROP takhangba agüja ex serviceman tem Tir kidangi lungkak aita ao.
Centre-i OROP scheme mapatong sangdonga alibaji parnoki magizüker.
Sorkari OROP scheme indang benokba anema noktaker ex-servicemen 2000 dak temai yashi Delhi, Haryana aser Punjab nung parnoki ngua aliba medal meyipa agütsüogo.
Indian Ex-Servicemen Movement Mendenbuba, Major General (Retd.) Satbir Singh-i, Defence Minister Manohar Parrikar-i tamalen OROP scheme nung nangzükba ama meinyak, ta aitsüogo.
Singh-isa, “Onok dang nangzükba ama sorkari onok nem OROP magütsü aser sorkari metetdaktsüba nung onük tenet matakloktsü. Onok jashir aser onok tejashi sayua onoki disctrict ajunga nungi medal meyipa agütsütsü,” ta ashi.
November 8 nü sorkari OROP sangdong ka agüja liasü, ajisüaka ibaji taküm September 5 nü Union Defence minister, Manohar Parrikar-i metetdaktsüba den mesütep.