Ex-Servicemen-i Aadhar Card & Jeeven Pramaan renemtsü tuyur

Dimapur, August 06 (TYO): Ex-Servicemen aser parnoki mesüba kinüngtsü aser chirnur ajungai Aadhar Card renemtsü tetuyuba ka Sainik Welfare & Resettlement Nagaland nung Director, Brig KK Roy Choudhury, SM, VSM (Retd)-i tanü Brehostibar nü agütsüogo.
“Pension agizüker aser pension magizüker Ex-Servicemen ajungai Kendriya Sainik Board, Directorate General Resettlement & Ministry of Defence (MOD) nungi Aadhar Card ajanga dang senotsü teyari agizüktsü asoshi Ministry of Defence-i latetja lir,” ta pai ashi.
Ano, “Ex-Servicemen ajunga ket nung Jeevan Pramaan ta ajaba Digital Life Certificate (DLC) alitsü tetuyuba ka MOD-i agütsüogo,” ta shia, pension agir aser kinüngertemi DLC taruba September ita 30 nü tashi nung renemtsü osang ka pai metetdaktsü.
“7 buba Pay Commission benokba sülenbo pension den sentakba maparen ajunga Aadhar Card aser DLC ajanga dang inyaktsü renema lir anungji, Ex-Servicemen aser parnoki mesüba kinüngtsü aser chirnurtemi Aadhar Card aser DLC renemtsü ajungshir,” ta pai shisem.
Paisa ashiba agi, Ex-Servicemen-i yamaji inyakba ajanga dang Ex-Servicemen yaritsü asoshi tentetba Rajya & Zila Sainik Boards (RSB/ZSBs)-i nüngdakba maparen sadema inyaktettsü.
Ex-Servicemen, parnoki mesüba chirnur aser asür Ex-Servicemen kinüngtsütemi pei meyong Pension Payment Order (PPO), Bank Account Number, Mobile Number, Aadhar Card aser Next of Kin (NOK) den sentakba osang tejangja pei alidak tentetba Zila Sainik Welfare Office nung benoka DLC-ji agizüktsüla, ta Choudhury-i metetdaktsü.