Exam centre tem nung tim mesüi benshiba azüoktsü

Guwahati, February 14 (Agencies): Police aser ketdangsertemi tatidang agiba tesemtem nung kaketshirtemi tim masüba yimyatem benshiba azüoktsü asoshi renemdar. Yamala tim masüba yimya timba yimdak yimtsüngtem aser state nung kinük tesemtem nung ataloker.
State education department ajanga ashiba Class X aser XII state board examinations agütsütsü aliba tesemtem kong kaketshirtemi tim masüba yimyatem benshir itemji asadangba nung class XII exam centre 200 aser class X exam centre 86 ta asateta metetdaktsüogo.
Tim masüba yimya benshiba Class X exam centre yaküm 103 aliba takümbo ajemer 86-i aluogo, ta osang ka ajanga metetdaktsü.
“Sorkari police aser district ketdangser den yamala yimyatem azüoktsü asoshi sentong yangludar. Yamala tesemtem nung security tali agütsütsü aser DC aser SP tem dang CCTV camera yua aliba mapangshia repranga asadangtsü asoshi asüngdangogo,” ta education minister Himanta Biswa Sarma-i ashi.
Education department ajanga ashiba agi tim masüba yimyatem benshiba tesemtemji timba ketdangsertemi yakta oa metongtetba tesemtem dang lir.
“Class X board agütsüba timtem tesemtemji timba lower Assam Dhubri district nung lir, saka Dhemaji, Lakhimpur aser Barak Valley district nung aliba centre tema tenük yoka repranga atatsü,” ta secondary education department nung ketdangser kati ashi.
Class X aser XII state board exam tem February 17 aser February 20 ta nungi tenzüka agitsü.