Excise Department-i luden ka tentettsü

Dimapur, February 24 (TYO): DNSU-i Dimapur nung yi ayokdak ajak shibangtsü mapang atakzüktsüba onük reprangshimtsü atema Excise Department-i luden ka shimtsü telemtetba agiogo.
Iba telemtetba ya February 24, 2020 nü Excise Directorate nung rongdak senden ka amendang agi aser Deputy Commissioner (NC) Convenor ser ludenji tentettsü.
Tanü amenba senden nung Excise, Sericulture and Minority Affairs Advisor Zhaleo Rio, Excise Secretary Orenphomo Kikon aser Senior Departmental Officers ajak aden.
DNSU-i iba takhangba agütsüba ya kanga süoki ia bilemtsüla aser yi shibelenba azüoktsü atema tangsa maparen tenzüktsüla. DNSU-i iba ultimatum agütsüba ya Department saksalemba mapang ka lir, ta Advisor Rio-i ashi.
Excise department-i NLTP Act mapa inyakdang tetsükdaktsütem ajurur. Iba mapa nung NGOs, Police & Administration aser sendaktepa alir ajaki yariteptsüla. Yi noktangba mapa ya nübortem indang mapa ka asütsüla. Talisa, tashi kari iba mapa inyakertem amokmerener anungji department ket nunga nüngdakbatem aser prangpong-injangtem peria alitsüla, ta paisa metetdaktsü.