Excise department-i sen lakh 4 alangba yi aser mozütem raksa endok

Dimapur, September 18 (TYO) : Tesüiba ita ana ser tesadang ka tsüngda Excise department-i sen lakh 4 shi alangba jenjang yi aser mozütem apuba Hokolbarnü Directorate office complex nung raksaa endokogo.
Ozüng alema shibelenba yi aser mozütemji June 1, 2015 aser August 18, 2015 tsüngda Excise Mobile Squad-i apubatem liasü aser item asoshi nisung 247 puogo aser ken o 247 tashi benoka lir.
Yi aser mozü shibelenba atema tai tonglokja alir nisungtem dang senchi achiba ajanga sen lakh 2 bendentetogo aser parnok ket nung apubaji, IMLF bottle 1071, beer bottle 1387, country liquor litre 25 aser opium seret 1 liasü.
Excise mapa inyakertemi timtem jenti ajuruaka kanga danga meranga Nagaland nung yi ayokba azüoktsü atema mapa inyaker, ta V. Maria Yanthan, Commissioner of Excise & Director of Prohibition-i ashi.
Excise department-i dang yi noktangba mapa inyaktsüba masü saka nisung ajaki shilem agitsüla. Talisa Arogotemi iba dak sendakba nung shilem tulu agitsüla, ta Maria Yanthan-isa ashi.
Tanü item yi aser mozü raksa endokba mapang Katoho Sumi, Superintendent of Excise (Mobile Squad)-i apuba osang ashi. Iba mapang arogo, district administration, judiciary aser tanga telok nungi teshimtet nübotem liasü.