Excise department-i temesepba mozü apu

Dimapur, Yimpoksüi/November 19 (TYO): Excise department, Nagaland, Narcotic Cell puri November 18 nü Inter-State Excise check gate Khuzama, Kohima nung opium powder gms 500 puogo.
Itangitertem nungi osang tejangja angazükba sülen Excise Narcotic Cell duty party puri Maruti Alto passenger gari ka Inter-State Excise checkgate Khuzama nung sot aser aija alisang temang nung temesepba mozü bener lia ngutet. Iba dak sendakba nung Senapati Town, Manipur nung alir Lakshman Prasad Gupta’er jabaso Ranjan Kumar Gupta(32 yrs) pua NDPS Act 1985 kübok pa anema ken o benokogo aser ken o mananei bushitsüngdangdar.
Tanga ttalokba ka nung Excise Narcotic Cell duty party-i November 19 nü Dimapur, Signal tesem nung alir Mrs. Amongla (40) ket nung Heroin gms 20 bener lia puogo. La anema NDPS Act 1985 kübok ken o benokogo aser maneni bushitsüngdangdar.
Temesepba mozü jenjang ya sen lakh 4 shi asütsü. Excise Narcotic Cell duty party nung AIEs Nokcha AO aser Chuba Yimchunger, head constables Tovika, Burtemshi, Sutsung, Anglong aser constables Merila, Mungnyu, Khumeng, Aienla, Vitsathrong, Khrielie, Chumben, aer Zhegukha nunger densema liasü, ta Dy Commissioner of Excise sangdong ka ajanga metetdaktsü.