Excise department-i yi raksa endok

Dimapur, May 14 (TYO) : Hokolbarnü Excise department Destruction Board-i sen 27,18,000 shi alangba yi raksa endok.
Directorate office complex nung yi raksa endokba mapang Dimapur district administration, Dimapur police, Dimapur Municipal Council, NGOs aser Arogotem nungi teshimtet nübotem aden.
Yashi raksa endokba yitemji taoba ita 7 tsüngda (October 2015 to April 2016) Dimapur district Excise personnel-i apuba liasü. Item yi apuba dak sendakba ken o tem nungi sen 18,24,000 senchi angu.
“Department nung nübo peria meliaka state-i yi bener aruba noktangtsü atema kanga meranga inyaker. Nisung ajaki pei tangatetba melenshir, kati ka yaritepa asen loktiliba nungi yi aser ozüng alema amshiba mozütem agientsü merangdi” ta Additional Deputy Commissioner, Excise, Pitongshe Sangtam-i metetdaktsü.
Taoba küm asem tsüngda Excise department-i yi bottle lakh 5.70 raksa endokogo aser itemji sen crore 15.50 shi jenjang liasü. Iba ba mapang department-i aibelenertem dang nungi sen crore 14.70 senchi chiogo.
Yi raksa endokba sentong nung mendenji Deputy Commissioner, Excise Lanuwati Jamir liasü aser Superintendent of Excise, Dimapur-i osang tatsüka metetdaktsü.