Excise (Narcotic Cell)-i sen lak 2 jenjang mozü apu

Dimapur, March 11 (TYO) : Brihostibar nikongtsütsü 4:00 ako meta Khuzama nung Excise (Narcotic Cell) ketdangsertemi ozüng alema amshiba aket mozü aika apu.

Ozüng alema amshiba mozütem indang jenjangji sen lakh shi indang liasü aser Nokcha-i anir Excise telok nung AIE, H/c Yeketo, Khriesazo , Const., Pangjung, Nyenben, Khumen, Khetoshi aser Pongyong nungertemi apu.

Dimapur nungi Manipur-i aoba truck gari ka nung Elturex (codeine) mozü pongdang 1861 bena liasü. Truck gari nungji cement bena liasü aser iba nung mozü pongdangtemji kanga junga miimbanger bena liasü, ta Deputy Commissioner, Excise (NC)-i metetdaktsü.

Excise ketdangsertemi asüngdangya asüdang mozüji Lahorijan, Assam nung alir Rocky Tulabi kinungtsü Rahama Tulabi-i abenba ta angazük aser iba jagi la apu.

Taoba ita kasa nisung jagi Elturex (codeine) pongdang 1000 miima shibelen aser lai ashiba agi mozüji Guwahati nung sen lakh kati alizük aser Manipur nung yokdoktsüba liasü, ta Excise ketdangserisa metetdaktsü.

Drugs and Cosmetics Act kübok Rahama Tulabi anema ken o benokogo, ta ketdangserisa ashi.