Excise-police atema ananü training tenzükogo

Dimapur, Sept. 05 (TYO): NCB, Zonal unit, Guwahati aser State Excise department senteper ayonga Mongolbarnü nungi tenzüka state Excise aser Police department ketdangsertem atema Directorate of Excise office nung anogo ananü drug law enforcement training tenzükogo.
Iba training tetenzük sentong nung jembidang Commissioner of Excise, Tarep Imchen-i training agitsüpurtem dang, “Iba training nung kanga nendaka adentsüla, kechiyong training nung kechisa angazükdir ibaji tanü asoshi dang masü saka tarutsü nung state-i tajangzük kanga angutsü,” ta ayongzük.
Paisa, Excise department nung nübo aser machineries ajema liaka department-i ozüng alema shilenertem mita state tesem ajaklen nükdar, ta ashi.
Paisa Excise sepaitemi ozüng alema shibelenba jenti apuba atema tenüngsang agütsü.
Sentong nungsa Deputy Commissioner of Excise (NC), Kevisetuo Angami-ia item dak sendakba temerenshi balala indang metetdaktsü.
Narcotics Control Bureau (NCB), Guwahati nungi shisalen sayurtemi iba training nung onük balala aika nung tesayuba agütsütsü.
Anogo ananü training nung Excise aser state police naprongla nungi nisung 15, ajak agi parnok 30 tendar.