Excise purtemi junga inyakogo

Nagaland nung yi meyanglutsü aser mayoktsü ozüng zünga liaka, Nagaland nung yia yanglur aser tayoka talubo ayoker. Iba kuliji mapang mapang shia Assam Rifles purtemi yi yangludak tesem aser yi ayokertem apuba osang ajanga metetter. Atangji, machimajemtsü shibelenba mapatem mita nokdangtsü asoshi government-i Excise department nung inyakertem yua lir, ajisüaka aiben Excise purtem dang nungibo Assam Rifles purtemiang teimba machimajemtsü shibelenertem apuba osang angashir. Ano, tesem kar nungbo arogo, watsü aser lokti tentettemiang machimajemtsü mita nokdangba asenoki ajurur. Aji oda, machimajemtsü shibelenba mapa mitba aser apuba mapatem nung, Excise purtem dang nungibo tangartemang teyakyakba ta bilema alidang, yakanü Dimapur nung Excise purtemi Guwahati len nungi yi bener aruba truck gari ka apuba angudang, parnok nem tenüngsang agütsür aser asen lima aser nübortem tsükchir ket nungi kümzükba mapa nung aonung temejanga junga memejangi temulung agüja inyakba angudang pelar. Akhidangbo, asen tsükchirji tangar yim aser kin liasü saka tanübo asen tsükchirji yi aser mozü kümogo. Item tsükchirtem yagibo akhidang nok nü agi samatsüba taküm dang nungibo kanga agia teimba samatsür. Aji oda, tanü Excise purtemi anir yi aser mozü mita apuba mapa nung lendong aser nüngsen tizükteta inyakba mapatemji asen chinur taküm aser kibong yi aser mozü agi meraksadaktsütsü asoshi inyakba mapatem lir. Atangji, ozüng anema inyakertem mita aputsü aser parnok azüoktsübaji mapa temela masü, parnokji ozüng raksartem asünungji tekümdang aser lendong nisungtem lir. Anungji, parnoki inyakba mapatem anema raratsü asoshi mezüngbuba nung, tangatetba aser temulungtetba nüngdaktsü, aji mesüra melamelaa mesüzükdaktsütsü aser ashiko parnokjiang ano shibelenertem yarir kümadoktsü ana nung lir. Tanabuba nung, parnok ket nung ozüng raksartem den raratsü atema nüngdak oset ajak peria akatsüla aser parnoki takok ngua inyakba mapatem reprangteta government-i konang nüngsang agütsütsüla. Atangji, yi aser mozümora mita nokdangba mapa lokti tentettemi inyakbaji junger saka tim masü, kechiyong iba mapaji arogo mesüra lokti tentet mapa masü saka Excise Narcotic purtem mapa lir. Ajisüaka, parnoka aitsütsüla masü, kechiyong Excise gate ajanga yi aser mozümora bener aitetba ajanga lanurtem taküm aika raksar aser kibong aika balalular. Anungji, asen lima nung machimajemtsü shibelenba mapatem takok ngua nokdangtettsü atema Excise Narcotic o lokti tentet aser arogo na longjemer inyaktsü junger. Tanü asüng asen lima nunga Community Policing indang jembir. Tetezü yimti anükba mapatem ya police-i dang masü saka nübortemia inyaktsüla, kechiyong ozüng raksartemji nübortem rongnung lir. Iba tangatetba nung Excise purtemi anira, Nagaland ya  yi aser mozümora nokdangba maparentem nung alimaia pelatsüsa inyaktettsü. Yi aser mozümora abenertem mulungjang ya kanga tekülak, kechiyong kechisüdir süaka parnoki yi aser mozüji Nagalad gate atena itettsüla. Iba jagi, Excise purtemi yakonung apuba yi case 450-jia  biscuits abener amai dang bilemdaktsütsüsa amtsük asepba carton agi nembanger liasü. Iba amaji kari jangotsü den külemi aser ano karibo lisem abener amai lisem den yi abenba osanga lir. Ano, tamalen karibo tasümang süngden nung yi sünga enoka bener aoba otsüa liasü. Ano, yi dang nungibo mozümora abentsüsa temelaba yanglur abener. Mozü ya kar powder aser kar süngjang ta lir, anungji karibo ango tebok dena paboker yangji enoka abener aser karibo salipong nung abener. Ano, tetsürtemi balaka telong sü nung melepboker abener. Iba amaji tasa tapu tapu yanglua chiyongtsü aser süoshi nung mozümoratemji melepboka abenba agi mitkartemi meputet yoker asütsü. Tanü asenok tsükchirtem asen süngküm atena aiter aser chirnur takidak maka küma maodang aser asenok kibongtem raksaa maodang, asenok ajaki kanga temulung agüja yi aser mozümora nokdangba tongpang nung shilem agitsüla aser Excise Narcotic purtemisa,ano, temulung tagütsüba agüja asen lima tsükchirtem nungi kümzüktsü asoshi indangindanga aser tasü itita inyaktsüla.