Exit poll ajanga temulung tatem: Priyanka Gandhi

New Delhi, May/Monupii 21 (Agencies): East Uttar Pradesh, Congress general secretary Priyanka Gandhi Vadra-i party nung inyakertem dang olulu aser exit polls tem ajanga parnok temulung matemdaktütsü atema mepeshiogo. Exit poll tem ajanga taküm Lok Sabha election, BJP-i aniba National Democratic Alliance (NDA) puri akoktsü ta sangdongba sülen lai iba olen ya lemsatep.
Audio osang ka ajanga Priyanka Gandhi-i party nung inyakertem dang kümkümshia alitsü aser Congress lenir aser züngsemtemi meranga inyakba süngjang tajung achitsü imlaa alitsü ajungshi.
“Olulu osang aser exit polls ya nenok tasümeiti kümdaktsütsü atema inyakba maparen ka dang lir. Nenok kümkümshia alitsü aser strong rooms aser counting centres tem meita alitsü kanga tongtibang. Nenoki aser onoki mapa meranga inyakba süngjang tajung achitsü,” ta lai ashi.
Exit poll timba kati BJP-i aniba NDA sorkari takok angutsüba sayuogo aser UPA kanga tesülen toktsüogo. Exit poll balala ti-i Narendra Modi tanaben Ato Kilonser akmtsüba takzüogo.
Ajisüaka party temi menden akoktsüba tetsüngda ita lir. BJP puri menden 316 nungi 202 tashi akoktsü ta imlar aser Congress-i menden 107 nungi 46 tashi akoktsü ta takzüogo.
Taoba mapang tem nung exit poll temi takzüba mataloki aruogo. Exit poll adoktsüba sülen BJP camp nung züngsemtem kanga pelatepogo aser parnoki ashiba agi, iba ajanga PM Modi nüngtugu akümba tali jangjashitsür, ta ashi. 2014 küm BJP puri menden 282 akok aser küm 30 tsüngda majority koktetba party mezüngbuba aküm.
Ajisüaka Congress puri exit poll dak tamang makar aser ashiba agi, taoba mapang tem nunga exit poll meshidak liasü.
“Exit Poll olulu osang dak ni mamanger. Iba olulu ajanga EVM meyirejang aika melenshidaktsütsü atema sentong yangluba ka lir. Ni opposition party ajak dang tali longjemshitsü, tashitaitba aser tasütaitba akümtsü mepeshir. Asenok senteper iba tongbang raratsü,” ta West Bengal CM Mamata Banerjee-i tweet asü.